Hagkerfið vantar 10.000 störf

Skapa þarf tíu þúsund störf á næstu árum til að koma á fullri atvinnu hér á landi og mæta vaxandi fjölda einstaklinga á vinnumarkaði. Þetta er meðal þess sem kemur fram í nýju tímariti Samtaka atvinnulífsins (SA) sem verður til umræðu á opnum morgunverðarfundi SA í Hörpu á morgun.

Í riti SA kemur fram að til þess að Íslendingar njóti sambærilegra lífskjara og nágrannaþjóðirnar þurfi árlegur hagvöxtur á næstu árum að vera yfir 3,5% og verðbólga lág.

Þá þurfi að skapa tíu þúsund ný störf til að sjá þeim fyrir störfum sem misstu vinnuna á árunum 2008 til 2012. SA reiknast til að takist að skapa fimmtán þúsund ný störf á næstu fimm árum nemi árlegur ávinningur samfélagsins um 60 milljörðum króna.

Á fundinum á morgun munu fjölmargir stjórnendur úr íslensku atvinnulífi ræða um leiðir til að fjölga störfum á Íslandi á næstu árum. Í þeim hópi verða Hörður Arnarson, forstjóri Landsvirkjunar, og Ásdís Halla Bragadóttir, stjórnarformaður Sinnum.