Skattar hækkuðu lán um 21 milljarð

Tæplega tíu prósent af nafnverðshækkun íbúðalána frá byrjun árs 2009 og til loka árs 2012 eru vegna skattkerfisbreytinga sem stjórnvöld hafa ráðist í.

Alls hafa skattkerfisbreytingarnar hækkað skuldir vegna íbúðalána um 21,6 milljarð króna. Þetta kemur fram í svari Katrínar Júlíusdóttur, fjármála- og efnahagsráðherra, við fyrirspurn Guðlaugs Þórs Þórðarsonar, þingmanns Sjálfstæðisflokksins, um áhrif aukinnar skattaálagningar ríkisstjórnarinnar á hækkun höfuðstóls íbúðalána.

Í svarinu kemur fram að skuldir vegna íbúðakaupa nemi 1.124 milljörðum króna í lok árs 2011. Stærstur hluti þeirra skulda er verðtryggður.

Frá byrjun árs 2009 og fram til loka árs 2012 hækkaði vísitala neysluverðs um 20,1 prósent. Það hefur hækkað höfuðstól verðtryggðra íbúðalána um 226 milljarða króna. Af þeirri nafnverðshækkun íbúðalána má rekja 9,6 prósent, eða 21,6 milljarða króna, til skattkerfisbreytinga.

Ráðherrann segir í svarinu að taka verði tillit til fleiri þátta. Meginmarkmið stjórnvalda væri að bæta afkomu ríkissjóðs, meðal annars með skattbreytingum, „til þess að draga úr skuldasöfnun og þar með vaxtakostnaði en hann er nú stærsti einstaki gjaldaliðurinn í rekstri ríkissjóðs[…]Hefði ekki verið gripið til þeirra aðgerða sem ríkisstjórnin hefur gert er mjög líklegt að geta heimilanna til að greiða húsnæðislán væri minni en hún er nú". Samkvæmt fjárlögum ársins 2013 mun vanta 3,7 milljarða króna upp á að tekjur ríkissjóðs dugi fyrir gjöldum hans.

Vaxtakostnaður vegna lántöku er áætlaður 84,7 milljarðar króna.

Þá segir Katrín að ríkisstjórnin hafi meðal annars beitt sér fyrir aðgerðum sem bætt hafi getu lántakenda til að greiða af íbúðalánum sínum, einkum þeirra sem eru með lágar tekjur og þunga vaxtabyrði. „Frá árinu 2008 og til ársins 2011 hækkuðu vaxtabætur og sérstök vaxtaniðurgreiðsla samkvæmt álagningu um 4,6 milljarða," segir í svarinu.