Reglan að rafmagnið fari

Íbúar á Vestfjörðum eru orðnir langþreyttir vegna langvarandi rafmagnsleysis og -skömmtunar undanfarin misseri. Rafmagnslaust var víða á norðanverðum Vestfjörðum í gær vegna skemmda á flutningslínum í Breiðadal, norður frá Mjólkárvirkjun í Arnarfirði. Er þetta í annað sinn á stuttum tíma sem Vestfirðingar glíma við rafmagnstruflanir sem raska meðal annars rekstri fyrirtækja.

Á fundi sínum í fyrrakvöld skoraði bæjarráð Ísafjarðarbæjar á stjórnvöld, Landsnet og Orkubú Vestfjarða (OV) að hraða uppbyggingu varaaflstöðvar í Bolungarvík og styrkja kerfi svæðisins til að koma í veg fyrir langvarandi rafmagnsleysi. Ljóst væri að afhendingaröryggi raforku á svæðinu væri með öllu óviðunandi og það væri orðin regla frekar en undantekning að tenging norðanverðra Vestfjarða við dreifikerfi dytti út þegar eitthvað væri að veðri.

Guðmundur Ingi Ásmundsson, aðstoðarforstjóri Landsnets, játar að hinir ýmsu annmarkar í rafveitukerfinu geri afhendingaröryggi minna á Vestfjörðum en annars staðar. Varðandi áskorun bæjarráðs segir hann lítið hægt að gera annað en að halda framkvæmdum áfram.

„Við getum einfaldlega ekki hraðað þeim þar sem þær eru á fullri fart," segir hann. Gert er ráð fyrir að aflstöðin komist í gagnið næsta haust og nemur kostnaður hundruðum milljóna.

Kristján Haraldsson, orkubússtjóri OV, tekur undir orð Guðmundar og segir afhendingaröryggi ábótavant, þó svo það hafi farið batnandi síðustu ár. „Það er mjög langt síðan við höfum lent í svona langvarandi ástandi, en það stafar af því hversu alvarleg línubilunin er núna," segir hann.

Guðni Einarsson, framkvæmdastjóri fiskvinnslufyrirtækisins Klofnings á Suðureyri, segir rafmagnsskammtanirnar orsaka eitthvert framleiðslutap hjá fyrirtækinu, en lítið annað sé hægt að gera en að laga sig að aðstæðum. „Auðvitað er þetta ekki viðunandi," segir Guðni.

Einar Valur Kristjánsson, framkvæmdastjóri hraðfrystihússins Gunnvarar í Hnífsdal, segir Landsnet og OV hafa staðið sig mun betur nú en um jólin varðandi upplýsingaflæði, meðal annars með fjöldaskilaboðum í síma. Bilanirnar hafi haft vond áhrif á tölvukerfi Gunnvarar og annan tæknibúnað en framleiðslan hafi náð að halda sér að mestu.

Varaaflstöðvar voru notaðar víða í gær og var rafmagn skammtað á Þingeyri, Flateyri, Ísafirði, Hnífsdal og Bolungarvík þar til viðgerð á Breiðdalslínu lauk síðdegis.- sv / þj