Á að móta áætlun um aukna hagsæld

Samráðsvettvangur um aukna hagsæld á Íslandi hefur verið settur á fót. Á honum munu formenn stjórnmálaflokka, aðila vinnumarkaðarins, forstjórar níu stórra íslenskra fyrirtækja og fulltrúar háskólasamfélagsins og stjórnsýslunnar eiga sæti.

Formaður þessa 26 manna hóps verður Ragna Árnadóttir. Hópurinn mun funda fjórum sinnum á árinu og er gert að móta heildstætt og óháð yfirlit yfir aðgerðir sem geta stuðlað að langtímahagvexti og efnahagslegum stöðugleika. Fyrsti fundurinn verður 11. febrúar og stefnt er að því að niðurstaða hópsins liggi fyrir í september.

Samhliða mun sjálfstæð verkefnastjórn, sem stýrt verður af Friðriki Má Baldurssyni prófessor, vinna að mótun tillagna sem eiga að geta stuðlað að sömu markmiðum. Viðfangsefnum hennar verður skipt í fimm málaflokka: þjóðhagslegt umhverfi, innlenda þjónustugeirann, alþjóðageirann, auðlindageirann og opinbera geirann. Fjórir til fimm vinna að hverjum málaflokki. Það fólk mun meðal annars koma úr greiningardeildum banka, stjórnsýslunni og háskólasamfélaginu.

Stofnun samráðsvettvangsins má rekja til þess þegar ráðgjafafyrirtækið McKinsey & Company kynnti skýrslu um leið Íslands til aukins hagvaxtar í lok október síðastliðins. Skýrslan var unnin að frumkvæði fyrirtækisins og endurspeglaði því óháð mat þess. Í henni var íslenskt efnahagslíf greint, hvar möguleikar þess til framþróunar lægju og til hvaða aðgerða þyrfti að grípa svo að auka mætti velsæld á Íslandi.

Í kjölfar birtingar skýrslunnar áttu sér stað óformlegar viðræður á milli stjórnmálaleiðtoga um myndun samráðsvettvangs. Þær skiluðu því að hafist var handa við að móta samráðsvettvanginn í forsætisráðuneytinu að beiðni Jóhönnu Sigurðardóttur.

thordur@frettabladid.is