Annie Mist sigraði þrátt fyrir meiðsli

Annie Mist Þórisdóttir heimsmeistari í CrossFit sigraði mót í Dubai þrátt fyrir meiðsli og  það sama gerði danski kærastinn hennar Frederik Aegidius en hann pakkaði karlaflokknum saman.

Meidd síðan í mars

„Ég er búin að vera meidd síðan í mars en það olli því að ég gat ekki tekið þátt á heimsmeistaramótinu í CrossFit núna í ár.  Það er búið að vera erfitt að vinna sig upp úr því en ég fékk útbungun í neðsta hryggjalið og það er búið að taka mun lengri tíma að jafna sig en ég bjóst við. Það er búið að vera erfitt bæði andlega sem líkamlega.  Örugglega eitt það erfiðasta sem ég hef gert var að horfa á HM í sumar og ekki getað tekið þátt," segir Annie spurð um meiðslin.

Hefur lagast mikið undanfarið

Hvernig ertu í bakinu núna? „Ég er búin að vera að hitta marga sjúkraþjálfara,  osteopatha,  ART og fleira.  Ég er með einn hérna á Íslandi sem ég hef mikið verið að hitta, Pétur í Atlas, en síðan hef ég verið að ferðast mikið til London til að hitta aðila þar sem hafa hjálpað mér mikið en þeir eru sérhæfðir í ART og Graston tækni.  Á tímabili reyndi ég að fara einu sinni í viku til London en þar hefur WOW Air verið mér frábær stuðningur.  Ég hef lagast mikið á seinasta mánuði og er núna loksins farin að geta byggt aðeins upp styrk aftur í fótunum," segir hún.

Dubai ævintýri sem endaði á verðlanapalli 

„Ég var í Dubai með kærastanum mínum til að styðja við hann en hann keppti á Fitness/CrossFit móti þar.  Daginn fyrir mót þá sannfærði hann mig um að ég gæti keppt líka.  Ég gat varla hugsað mér að horfa á einu sinni en án þess að geta tekið þátt. Þar kemur keppnisskapið inn (hlær). Ég ákvað að taka þátt en að ég myndi stoppa ef bakið myndi versna.  Mér til mikils léttis fann ég ekki fyrir neinu og ljóst að æfingarnar sem ég hef þó getað verið að gera hafa gert sitt gagn," útskýrir Annie.

Segðu okkur aðeins frá þessu móti? „Þetta var sem sagt fitness mót í Dubai sem furstinn Majid hélt.  Furstinn er mikið fyrir CrossFit og heilbrigðan lífsstíl. Hann hefur verið að reyna að vekja athygli á hreyfingu og næringu í Dubai.  Þeir flugu inn íþróttafólki úr mismunandi greinum og þar á meðal CrossFit.  Þetta var þriggja daga mót með samtals átta keppnum sem voru haldnar á skautasvellinu í Mall of Dubai sem er stærsta verslunarmiðstöð í heimi en mótið var sýnt í beinni útsending á Dubai Sport alla dagana."

Sigraði erfiðan keppinaut

Var þetta mikil samkeppni fyrir þig? „Já, furstinn hafði flogið inn stelpu að nafni Lindsey Valenzuela en hún var í 2. sæti á HM í CrossFit núna í ár þannig að ég hafði næga samkeppni og kom sjálfri mér virkilega á óvart þegar mér tókst að vinna," segir Annie ánægð.

Hvernig var að keppa í Dubai - öðruvísi en hérna heima eða í USA?  „Mér fannst Dubai æðisleg borg en að sjálfsögðu eru hlutirnir aðeins öðruvísi.  Stelpur þurftu að keppa í stutterma bolum og buxum sem náðu niður fyrir hné og strákar þurftu að vera í bol.  Þegar keppt var í sundinu þá mátti pabbi til dæmis ekki koma að horfa á vegna þess að einungis konum var heimilað aðgengi."

Fjölskyldunni flogið út

„Annars var hugsað alveg hrikalega vel um okkur.  Þegar furstinn komst að því að við vorum þarna þá bauð hann okkur á Armani hótelið í Dubai og þegar hann komst að því að ég ætlaði að keppa flaug hann foreldrum okkar til Dubai og bauð þeim á hótelið líka.  Þetta varð því að þvílíku ævintýri þegar upp var staðið."

„Það var einhver með okkur öllum stundum til að sjá til þess að okkur vantaði ekkert og einnig til að sýna okkur borgina og allt það markverðasta.  Til að toppa þessa ferð þá unnum bæði ég og Frederik mótið þannig að hún hefði ekki getað endað betur.  Mikilvægast fyrir mig þegar upp er staðið var að þetta sýndi mér að ég get komið til baka og vonandi sterkari en áður."

Undirbýr opnun CrossFit Reykjavík í Faxafeni

Hvað er framundan hjá þér? „Það helsta er að CrossFit Reykjavik er að fara að halda stór opnunar daginn sinn þann 12. október og á þá allt að vera tilbúið í nýja húsnæðinu okkar í Faxafeni 12.  En þar vorum við að opna í tæpum 1800 fermetrum,  þannig að það er búið að vera nóg að gera í að standsetja það.  Næstum allt komið en við erum að leggja loka höndina á spa-ið. Síðan er bara að halda áfram að byggja sig upp. Gera bakið sterkara en nokkurn tíman áður og vera tilbúin í að keppa á næsta ári," segir Annie.

CrossFit Reykjavik

Post by Lífið á Visir.is.