Jólagestir Björgvins 2013 tilkynntir

Jólagestir Björgvins 2013 hafa verið tilkynntir. Óhætt er að segja að dagskráin sé mjög spennandi, en margir nýir og ungir listamenn, sem ekki hafa komið fram á tónleikunum áður, koma fram í ár.

„Þetta leggst mjög vel í mig,“ segir Unnsteinn Manuel Stefánsson, söngvari hljómsveitarinnar Retro Stefson, sem kemur fram á jólatónleikunum í fyrsti skipti.

„Ég er aðdáandi Björgvins en hef þó aldrei komist á jólatónleikana. Það verður mjög gaman að fara í fínu fötin og syngja inn jólin," bætir Unnsteinn Manuel við.

Á meðal þeirra sem fram koma eru Eyþór Ingi Gunnlaugsson,  Hulda Björk Garðarsdóttir, Arnór Dan Arnarson, Eivör Pálsdóttir og Unnsteinn Manuel Stefánsson, ásamt mörgum fleirum.

Þá koma einnig fram listamenn sem áður hafa komið fram á tónleikunum, líkt og Helgi Björnsson, Ragnhildur Gísladóttir, Sigríður Thorlacius, Gissur Páll Gissurarson og Svala Björgvinsdóttir.

Sérstakur gestur á tónleikunum er John Grant og þá mun sigurvegari Jólastjörnunnar einnig koma fram.

Frekari upplýsingar um tónleikana má nálgast hér.