Frá Barcelona í Kirsuberjatréð

Ég hefði átt að vera komin með góðan skammt af sól eftir árin í Barcelona en samt var erfitt að flytja heim í rokið og rigninguna. En ég nýti mér það í sköpunina, verð inni í hlýjunni og hanna. Ég er að vinna nýja peysu- og kápulínu,“ segir Kolbrún Ýr Gunnarsdóttir fatahönnuður. Hún er nýflutt heim frá Barcelona þar sem hún var í námi í fatahönnun við IED.

Kolbrún er gengin til liðs við Kirsuberjatréð á Vesturgötu og hefur komið sér upp vinnustofu. Auk peysa og kápa vinnur hún að skartgripalínu upp úr eldri skartgripum.

„Ég hef verið dálítið upptekin af endurvinnslu en lokaverkefnið mitt í IED tengdist endurvinnslu húsgagna. Ég komst í svo mikið efni þarna úti en á Spáni er miklu meiri vitund um endurvinnslu en hér heima,“ segir Kolbrún.

„Ég kláraði skólann fyrir ári og vann eftir það að tvennum fylgihlutalínum, svona meðfram því að njóta borgarinnar. Nú er ég að gera það sem mig hefur alltaf dreymt um, ekki að fjöldaframleiða heldur vinna hlutina sjálf, hægt og rólega. Þetta verður ein og ein flík í einu og líklega engin þeirra eins. Fólk verður bara að vera duglegt að koma við hjá mér og kíkja,“ segir Kolbrún.

Áður rak Kolbrún verslunina Kow á Laugaveginum en segist hæstánægð með fyrirkomulagið í Kirsuberjatrénu.

„Hugmyndin á bak við Kirsuberjatréð gengur út á að hönnuðirnir innan þess vinna allt sjálfir. Ég smellpassa inn í það fyrirkomulag. Verslunarrekstur sem slíkur er ekki endilega spennandi og það er því frábært að geta deilt honum með fleirum og hafa þá meiri tíma til að vera skapandi.“

Hægt er að forvitnast um hönnun Kolbrúnar á facebook.