Kennari í Vesturbæjarskóla talinn leggja nemendur í einelti

Á fundi foreldra í bekk á miðstigi við Vesturbæjarskóla, sem haldinn var í vikunni var ákvörðun tekin um að taka málið lengra út fyrir skólann og tilkynna einelti kennarans viðeigandi yfirvöldum til rannsóknar.

Foreldrarnir hyggjast einnig fara fram á rannsókn um hvort skólastjórnendur hafi brugðist skyldum sínum í meðferð málsins, meðal annars með því að taka frekar undir með málstað kennarans og víkja ekki viðkomandi frá störfum á meðan á rannsókn stóð.

Í fundargerð foreldra, sem fréttastofa hefur í höndum segir;

„Á fundinum kom í ljós að ekki er um einangrað ofbeldi gagnvart einum nemanda að ræða, heldur hafa aðrir nemendur verið beittir ofbeldi, niðurlægðir og margir krakkar í bekknum miður sín efir að hafa orðið viti af þessu.“

Þar segir jafnframt;

„Skólastjóri hlýtur að vera ábyrgur fyrir þessu en hann hefur vikið sér undan í málinu og tekið málsstað kennarans.“

Settur skólastjóri í vesturbæjarskóla fór í veikindaleyfi í gær og vildi ekki tjá sig við fréttastofu um málið. Þá tókst ekki að ná tali af kennaranum sem um ræðir.

Foreldri sem fréttastofa ræddi við í dag sagði það sæta mikilli furðu að mál sem þessi væru aðeins rannsökuð innnan skólanna sjálfra en ekki af hlutlausum aðila. Þá væri einnig undarlegt að í ljósi mikils átaks í að innleiða Olewusaráætlunina, um meðferð eineltis, í skóla væri ekkert eftirlit með því hvort henni væri framfylgt.

Halldóra Gunnarsdóttir, framkvæmdastýra Barnaverndar Reykjavíkur, staðfesti við fréttastofu að sér væri kunnugt um málið en frábað sér frá viðtölum að sinni, eða þangað til að formleg tilkynning hefði borist. Hún tók einnig undir með foreldrinu og sagði fullt tilefni til þess að skoða eftirfylgni með eineltisáætlunum.