Risalaxeldi má ekki hindra olíuleitarskip

Ef áform Laxa fiskeldis ganga eftir mun framleiðsla fyrirtækisins á eldislaxi í Reyðarfirði og Fáskrúðsfirði verða ríflega tuttugu þúsund tonn á ári.

Fyrirtækið hefur þegar starfsleyfi fyrir sex þúsund tonna framleiðslu í Reyðarfirði sem hefja á vorið 2014 en vill bæta tíu þúsund tonnum við. Í Fáskrúðsfirði vill fyrirtækið leyfi fyrir fjögur þúsund tonna ársframleiðslu.

„Með auknu eldismagni skapast meira hagræði í rekstri, betri samkeppnisstaða og traustari grundvöllur fyrir starfsemina. Með tilkomu laxeldis af þessari stærðargráðu munu stoðir atvinnulífs í Fjarðabyggð styrkjast,“ segir í greinargerð Laxa fiskeldis.

Skipulagsstofnun hefur óskað eftir áliti Fjarðabyggðar á því hvort framkvæmdin eigi að vera háð mati á umhverfisáhrifum. Sú umsögn er í vinnslu og verður lögð fram á bæjarstjórnarfundi á fimmtudag í næstu viku.

Páll Björgvin Guðmundsson bæjarstjóri segir að þótt menn fagni allri nýrri atvinnustarfsemi þurfi að líta til fleiri þátta.

„Við horfum til framtíðaruppbyggingar á hafnarstarfsemi á Reyðarfirði, ekki síst með þjónustu við olíuleitarfyrirtæki á Drekasvæðinu í huga. Það er því afar mikilvægt að sjókvíar verði ekki til að teppa siglingaleiðir í firðinum,“ nefnir Páll sem dæmi um þætti sem séu til skoðunar hjá heimamönnum.

Í greinargerð Laxa fiskeldis segir um þetta að kvíunum sé valinn staður „vel utan siglingaleiða“.

Landssamband veiðifélaga mótmælti á sínum tíma þegar sex þúsund tonna starfsleyfið var til umfjöllunar. Haft var eftir Óðni Sigþórssyni, formanni sambandsins, í ríkisútvarpinu í nóvember 2011 að eiga mætti von á því að einn lax úr hverju tonni myndi sleppa úr sjókvíunum. Þannig myndu sex þúsund laxar sleppa árlega og leita upp í ár til hrygningar. Um væri að ræða norskættaðan lax og menn óttuðust áhrif hans á íslenska laxastofna.

Laxar efh. telja hins vegar ekki hættu á ferðum að þessu leyti.

„Reynslan sýnir að í fullkomnustu kvíunum, sem eru sömu gerðar og Laxar ehf. munu nota, hefur enginn lax sloppið út,“ segir í greinargerð fyrirtækisins þar sem vísað er til þess að þegar mikið af eldislaxi og hafbeitarlaxi hafi gengið í Elliðaárnar á níunda og tíunda áratugnum hafi engin blöndun við náttúrulega stofninn þar greinst. Þar að auki séu engar laxveiðiár í Reyðarfirði.