Eldur í Vestmannaeyjum: 25 slökkviliðsmenn fóru í útkallið

Eldur kom upp á háalofti einbýlishúss að Heiðarvegi í Vestmannaeyjum á fjórða tímanum í dag. Engar skemmdir urðu á húsinu þar sem slökkviliðið slökkti eldinn fljótt en þó barst töluverður reykur um allt hús.

„Fyrst notuðum við handslökkvitæki og svo smá vatn, þetta fór betur en áhorfðist," segir Ragnar Baldvinsson, slökkviliðsstjóri í Eyjum.

Kona sem býr í húsinu varð var við eldinn og var slökkviliðið fljótt á vettvang. „Hún var komin út úr húsinu þegar við komum á svæðið þannig að engin slys urðu á fólki," segir hann.

Það sem vakti athygli fréttamanns er að nóg var af slökkviliðsmönnum á svæðinu, á þessari litlu eyju. „Við vorum tuttugu og fimm sem fórum í þetta útkall," segir Ragnar. „Við erum þrjátíu í heildina."

Ragnar er þó eini slökkviliðsmaðurinn í fastri vinnu, hinir sem hjálpa til í útköllum eru í vinnu annars staðar. „Hún er ekki stór eyjan svo við erum snöggir að koma. Okkur vantar að getað kallað í næsta nágranna og sá næsti er í Reykjavík, og þá er það bara þyrla," segir hann hress.

Talið er að eldurinn hafi kviknað í út frá rafmagni.