Steingrímur lítur í baksýnisspegilinn: Hefði örugglega mátt gera margt betur

„Það eru ein mistök sem eru stærst í þessu máli og þau eru að leyfa þessu máli að verða til," sagði Steingrímur J. Sigfússon í óundirbúnum fyrirspurnum á Alþingi í dag um Icesave-málið.

Steingrímur sagði að Icesave-reikningarnir hafi búið til stórhættulega stöðu fyrir Ísland, sem var alveg fram á gærdaginn ekki ljóst hvernig landið kæmist frá. „Sú staðreynd að íslenskum banka var leyft að safna þessum óhemjuinnistæðum í útibúum á erlendri grund, og það átti að heita tryggt að íslenska innistæðutryggingakerfinu, bjó til stórhættulega stöðu fyrir landið. Það má segja að það hafi ofvöxtur bankana í heild sinni gert. Þegar við á litla Íslandi vorum allt í einu með bankakerfi með mikilli alþjóðlegri starfsemi sem var 7 sinnum stærri en landsframleiðslan og 10 sinnum stærri en landsframleiðan þegar gengið féll," sagði Steingrímur.

„Örugglega hefði mátt gera margt betur ef maður lítur í baksýnisspegilinn og ég er ekki að skorast undan því að líta á minn hlut í þeim efnum, það er alveg augljóst mál. [...] Ég sá það ekki fyrir að þetta mál myndi verða að þeim ósköpum í íslenskum stjórnmálum sem raun bar vitni," sagði hann.

Það verði að skoða stöðuna eins og hún var uppi á hverjum tíma, og ef menn ætluðu að rifja upp málið þyrfti að byrja sumarið 2008.

Þá upplýsti hann um hver staðan væri nú á Icesave-samningunum sem gerðir voru á sínum tíma. Fyrsti samningurinn, Svavars-samningurinn svokallaði, stæði nú í 137 milljörðum króna á núvirði með 6 % núvirðingarstöðul. Icesave II stæði í 94 milljörðum króna og síðasti samningurinn, sem Lee Bucheit gerði fyrir hönd Íslands, stæði í 63 milljörðum króna.