Viltu njóta lífsins - þá er þetta starf líklega fyrir þig

„Þetta felst aðallega í því að prófa vörurnar okkar. Við viljum fá fólk sem prófar vörur og þjónustu, þannig starfið gengur eiginlega bara út á það að fara út að borða, fara á hótel eða í nudd eða dekur og annað eins," segir Kristján Einar Kristjánsson, viðskiptastjóri Hópkaupa.is, þegar hann reynir að útskýra fyrir hlustendum Bylgjunnar í þættinum Reykjavík síðdegis í dag, út á hvað besta starfið á Íslandi gengur.

Hópkaup hefur verið að auglýsa besta starf á Íslandi undanfarna daga, en áhugasamir geta mætt í Bíó Paradís næsta fimmtudag telji þeir sig hæfa í starfið.

En hvaða hæfniskröfur eru gerðar til starfsins:

„Helsta skilyrðið er að viðkomandi hafi náð 20 ára aldri," segir Kristján Einar. „Annars þurfa þeir að vera skemmtilegir og það er mikilvægt að þeir geti sagt frá," bætir Kristján Einar við. Hann segir að það sé ekki verra ef viðkomandi hefur einhverja kunnáttu við að búa til myndbönd. „Annars gerum við ekki háar kröfur," segir Kristján Einar.

Enn er óvíst hvort um framtíðarstarf sé að ræða eða hvort einn eða fleiri verða ráðnir. Fyrir áhugasama hefjast viðtölin í Bíó paradís næsta fimmtudag klukkan fimm.

Hægt er að hlusta á viðtalið við Kristján Einar hér fyrir ofan.