David James: Íslenska sólin er til vandræða

Guðjón Guðmundsson, íþróttafréttamaður á Stöð 2 Sport, tók viðtal við David James, markvörð ÍBV, eftir 1-1 jafntefli liðsins í kvöld á móti Íslandsmeisturum FH. James líkar lífið á Íslandi en kvartar undan dagsbirtunni á Íslandi.

„Ég er ekki ánægður með að fá bara eitt stig því mér fannst við vera betra liðið í þessum leik. Við vorum mikið með boltann en hefðum kannski getað skapað okkur fleiri færi með betri sendingum," sagði David James.

„FH á samt að vera besta liðið á Íslandi og við komum hingað og náðum í eitt stig sem er ekki slæmt. Það er samt pínu pirrandi að ná ekki að taka með okkur öll stigin," sagði James en hvað með lífið í Vestmannaeyjum.

„Íslenska sólin er til vandræða því hún vekur mig klukkan hálf sex á morgnanna. Ég gat ekki undirbúið mig fyrir hana en ég elska lífið á Íslandi og er mjög ánægður með liðið mitt eins og er," sagði James.

„Ég er viss um að ég endist fram í október. Sólin er reyndar að verða enn erfiðari viðureignar en ég þarf bara kannski að fá mér eitthvað fyrir augun," sagði James kátur eftir leik.

Það er hægt að sjá allt viðtal Guðjóns við David James með því að smella hér fyrir ofan en þar eru einnig viðtöl hans við Atla Guðnason, Heimi Guðjónsson og Hermann Hreiðarsson.