Morðrannsóknin á lokametrunum

Rannsókn á manndrápi í blokkaríbúð við Blómvang á Egilsstöðum í maí er á lokametrunum, að sögn Elvars Óskarssonar hjá lögreglunni á Eskifirði.

„Það tekur tíma, til dæmis fyrir tæknideildina, að vinna úr gögnunum sem berast til hennar og skila heildstæðri skýrslu. En einhvern tímann þurfum við að skila af okkur gögnum í hendurnar á ríkissaksóknara. Það fer að styttast í það – það verður á næstu vikum,“ segir Elvar.

Hálfþrítugur maður, sem bjó í sömu blokk og fórnarlambið Karl Jónsson, hefur setið í gæsluvarðhaldi frá því að málið kom upp. Það var framlengt á föstudaginn var til 30. júlí og verður gert áfram að minnsta kosti þangað til ríkissaksóknari hefur ákveðið hvort hann verði ákærður.

Maðurinn vildi lítið tjá sig um málið í upphafi og að sögn Elvars hefur lítið breyst í þeim efnum. Hann hefur verið látinn gangast undir geðrannsókn en hvorki Elvar né Guðrún Sesselja Arnardóttir, verjandi mannsins, vilja gefa upp hvort hann sé talinn sakhæfur eða ekki.