Ók alltof hratt undir áhrifum fíkniefna

Ökumaður sem tekinn var fyrir of hraðan akstur á Kringlumýrarbraut rétt eftir miðnætti í gær reyndist einnig vera undir áhrifum fíkniefna. Hann var handtekinn og tekin voru sýni og skýrsla af honum. Þá voru fjórir til viðbótar teknir fyrir ölvunarakstur í nótt.

Par var handtekið í austurborginni í gærkvöldi grunað um þjófnað úr verslnum. Parið er grunað um ítrekuð brot og voru þau vistuð í fangageymslu. Tilkynnt var um líkamsárás á Laugavegi um klukkan fjögur í nótt og var árásarmaðurinn handtekinn og vistaður í fangageymslu. Sá sem fyrir árásinni varð var fluttur á slysadeild til aðhlynningar.

Að sögn lögreglu var maður handtekinn í nótt grunaður um að rækta marijúana. Lagt var hald á plöntur og telst málið upplýst.

Mikið var um útköll lögreglu vegna hávaða, ölvun á heimilum og veitingahúsum.