Dóra María vonast eftir því að fá leik á afmælisdaginn

„Ég held að við séum nú frekar slakar. Öll pressan er á þeim og það hefur verið gaman að fylgjast með fjölmiðlum hérna. Þeir eru ekki að setja neina pressu á okkur. Við erum hérna fyrst og fremst til að njóta og auðvitað nýtur maður sín best þegar maður nær árangri. Við erum ekkert orðnar saddar þótt að við séum komnar í átta liða úrslitin," segir Dóra María Lárusdóttir ein af leikmönnum íslenska liðsins sem verður í eldlínunni á móti Svíum í dag í átta liða úrslitum EM.

Íslensku stelpurnar hafa æft vítaspyrnur á síðustu æfingum.  „Það þarf að vera við öllu búinn og við æfðum víti á æfingu í gær. Það væri betra að klára þær í venjulegum leiktíma en ef að það fer í vítaspyrnukeppni þá erum við búnar að undirbúa okkur fyrir það," segir Dóra María.

Dóra María mun halda upp á 28. afmælisdaginn sinn þegar undanúrslitaleikurinn fer fram í Gautaborg 24. júlí.

„Ég man ekki eftir sumri þar sem að ég hef ekki spilað á afmælisdaginn minn. Það hlýtur bara að vera sama upp á teningunum núna. Ég hef aldrei tapað á afmælisdaginn og það þýðir bara úrslitaleikur.

Það væri fínt að geta haldið upp á afmælið í þessu fína veðri," segir Dóra María.

Svíarnir eru sterkir og Dóra María veit að íslenska liðið þarf toppleik til þess að tryggja henni leik á afmælisdaginn.

„Þær eru með gríðarlega öflugt lið. Við þurfum að ná upp sama leik og gegn Hollandi þar sem við náðum að loka þessum svæðum fyrir aftan okkur. Þær eru með mjög svipaða leikmenn og Hollendingarnir, hraða og tekníska framherja. Við þurfum fyrst og fremst að vera mjög agaðar í varnarleiknum og svo vonandi ná að sækja hratt þegar tækifæri gefst.Við náðum samt að skapa okkur færi í síðasta leik þótt að við lægjum aftarlega með liðið, Það er mjög jákvætt," sagði Dóra María.

Leikur Íslands og Svíþjóðar í átta liða úrslitum á EM kvenna í fótbolta hefst klukkan 13.00 að íslenskum tíma.