Einbeittur brotavilji í miðbænum - daglegar skemmdir á listaverki

Skúlptúr sem settur var upp til þess að lífga upp á torg við Bernhöftstorfuna í sumar hefur þurft að þola skemmdarverk nánast á hverjum degi síðan hann var settur upp.

„Hann hefur orðið fyrir barðinu á miðbænum,“ segir Sigurður Arent Jónsson, einn þriggja hönnuða skúlptúrsins.

„Við hugsuðum út í það að verkið myndi lenda í einhverju yfir sumartímann en þetta kemur manni í opna skjöldu. Að það sé þjösnast á þessu dag eftir dag það mikið að það sé verið að rífa upp hellur og beygja teina.“ Hann segir öll möguleg skemmdarverk hafa verið unnin á skúlptúrnum. „Það er búið að rífa út setuaðstöðuna, vaða út í tjörnina og rífa upp listaverkið, hreyfa það um allt og kremja boltana sem listaverkið samanstendur af.“

Skúlptúrinn var settur upp í tengslum við verkefni á vegum Reykjavíkurborgar. „Það var lýst eftir áhugasömum hönnuðum og listafólki til þess að taka í fóstur eitt af þessum torgum bæjarins sem hafa fallið í gleymsku og lífga upp á þau í sumarfríinu,“ útskýrir Sigurður.

„Við fengum Bernhöftstorfuna, fólk stoppar ekki mikið þarna og nýtir sér þetta lítið.“ Hann segir verkið greinilega þjóna tilgangi sínum við að draga fólk að en það vanti að gestirnir njóti svæðisins. 

„Það væri æðislegt ef fólk gæti látið þetta vera næstu vikurnar. Við erum að íhuga það að setja upp eftirlitsmyndavél þarna og hreinlega kæra fólk sem er að skemma þetta enda er um hrein og bein skemmdarverk að ræða.“ 

Með Sigurði í verkefninu eru Laufey Jónsdóttir og Friðrik Steinn Friðriksson. Segist hópurinn vera í fullri vinnu við að laga listaverkið á hverjum degi. „Við verðum að halda þessu við.“ 

Sigurður hefur engan grunaðan um skemmdarverkin en finnst þó ólíklegt að þetta séu ferðamenn. 

„Þetta virðist vera svo einbeittur brotavilji. Ef það er einhver ósáttur við verkið eða hefur einhverjar upplýsingar má sá hinn sami endilega hafa samband við okkur. Markmiðið er að sem flestir njóti svæðisins.“