Þingmaður hljóp Laugaveginn í annað sinn

„Þetta er í annað sinn sem ég tek þátt í hlaupinu. Ég hljóp í fyrra á snöggt um betri tíma eða 6,5 klukkustund en nú fór ég á tæpum sjö,“ segir Róbert Marshall, þingmaður Bjartrar framtíðar, sem hljóp Laugaveginn, 55 kílómetra leið, í leiðindaveðri um síðustu helgi.

„Það ringdi allan tímann og það var miklu meiri snjór við Hrafntinnusker og þar um kring. Ég átti samt miklu betra hlaup núna, fór miklu skynsamlegra í þetta. Fór rólega af stað, vandaði mig við að ganga upp allar brekkur og í snjónum - reyndi að spara. Frá Álftavatni og niður úr var ég eiginlega bara að taka fram úr öðrum,“ segir Róbert.

Róbert er mikill hlaupagarpur því fyrir utan Laugavegshlaupinn tvö hann hlaupið eitt maraþon og nokkkur hálf-maraþon. „Ég er að finna mína fjöl í þessum fjallahlaupum. Þau eru dálítið öðruvísi en götuhlaupin og miklu skemmtilegri. Þarna er með maður með þögnina og nýtur þess - ég naut hlaupsins líka í botn.“

Róbert segist bara hafa verið tvo daga að jafna sig líkamlega eftir hlaupið. „Þetta er þannig atburður að maður er í þögulli virðingu vikuna á eftir. Ef þetta nær manni langar mann bara til að gera þetta aftur og aftur. Ég er strax farinn að sjá hverju ég geti breytt á næsta ári,“ segir Róbert.

Spurður hvort hann sé mesti langhlaupari þingsins segir Róbert: „Ég er með besta maraþontíma þingmanna. Meðal starfsmanna þingsins á Stígur Stefánsson á alþjóðasviðinu betri maraþontíma en ég - munar um fjórum mínútum. Magnús Orri Schram var með aðeins betri tíma en ég en nú er hann fallinn af þingi svo hann telst ekki með," segir Róbert.

Pétur Blöndal, þingmaður Sjálfstæðisflokksins, er hins vegar sá þingmaður sem hefur hlaupið Laugaveginn oftast eða sex sinnum. „Hann fór töluvert hægar yfir en ég - fór þetta á meira á seiglunni,“ segir hlaupagarpurinn Róbert Marshall.