Vill standa vörð um Landspítalann en getur ekki lofað auknu fjármagni

Kristján Þór Júlíusson, heilbrigðisráðherra, segir unnið að lausn á vanda Landspítalans. Hann segist vilja standa vörð um spítalann, en segist ekki geta lofað auknum fjárframlögum.

Staðan á lyflækningasviði Landspítalans er mjög alvarleg að mati formanns Læknafélag Íslands. Eins og við greindum frá í gær munu aðeins sex deildarlæknar sinna tuttugu og fimm stöðugildum frá og með október næstkomandi, en lyflækningasviðið er eitt mikilvægasta og stærsta svið spítalans.

Það er þó ekki eina sviðið sem glímir við vanda því manneklan er víða. Þá hafa ítrekaðar fréttir verið fluttar af lökum tækjakosti spítalans. Framkvæmdastjóri lækninga spítalans lýsti þessu sjálfur í grein fyrir tveimur vikum.

Landspítalinn hefur í raun glímt við alvarlegan fjárhagsvanda undanfarin fjögur ár. Þessi vandi birtist í skertri þjónustu og staðan er þannig núna að öryggi sjúklinga stendur ógn af fjárhagsvandanum. Um þetta hafa vitnað læknar á spítalanum og stjórnendur hans. Stóra spurningin sem blasir við er því: Hvað ætlar ríkisstjórnin að gera?

Kristján Þór Júlíusson heilbrigðisráðherra ber þungar byrðar á sínum herðum sem ráðherra málaflokksins.

Hvað ætlið þið að gera varðandi Landspítalann? Ætlið þið að hafa þetta óbreytt ástand, status quo, eða ætlið þið að auka fjárframlög til spítalans? „Eins og ég segi það kemur í ljós í fjárlagafrumvarpinu hvað gert verður. Við erum að ræða það þessa dagana,“ segir Kristján Þór.

Hvað viltu sjálfur gera? „Ég vil gjarnan standa vörð um þá starfsemi sem Landspítalanum er ætla að sinna. Og ég tel full færi til að gera það, en það er ljóst að við þurfum að bæta úr á sumum sviðum þar. Meira gef ég þér ekki upp í bili. Það eru alveg hreinar línur að ég ætla ekki að birta þér eða Landspítalanum það hér í beinni útsendingu. Ég vil vinna þetta eins vel og ég get. Ég er að hlusta eftir athugasemdum sem okkur eru að berast út úr Landspítalanum og ég tel það skyldu mína að heyra sem flest sjónarmið, leggja mat á þau og fara síðan yfir það með stjórnendum spítalans hvernig brugðist verður við,“ segir Kristján Þór Júlíusson, heilbrigðisráðherra.