Full ástæða til þess að hafa áhyggjur af aukinni svifryksmengun

Loftgæði á Íslandi eru almennt nokkuð góð en full ástæða er til að hafa áhyggjur af aukinni svifryksmengun í þéttbýli. Ný skýrsla um loftgæði og heilsufar á Íslandi var kynnt í dag.

Andrúmsloft utandyra á Íslandi er almennt hreint og lítt mengað, þótt töluverður munur geti verið á þéttbýli og dreifbýli og aðstæðum hverju sinni. Álag hefur hins vegar aukist vegna meiri umferðar, aukins iðnaðar og framkvæmda ýmiss konar, segir í skýrslunni sem var kynnt á málþingi um loftgæði og lýðheilsu á Nauthóli í dag.

Sigurður Þór Sigurðarsson lungnalæknir og lýðheilsufræðingur sat í skýrsluhópnum, hann segir að full ástæða sé til að hafa áhyggjur af svifryksmengun í þéttbýli en mesta mengunin mælist í miðbæ Reykjavíkur.

„Hvað er það helst sem þarf að hafa áhyggjur af?“

„Það er svifrykið og þau efni sem eru í því eins og köfnunarefnissambönd ýmiskonar og brennisteinssambönd, óson og fleira. Þessi efni hafa tengsl við lungnasjúkdóma og ýmis önnur heilsufarsvandamál, hjarta og æðasjúkdóma til að mynda, meðal nýlegar íslenskar rannsóknir sem sýna fram á það,“ segir sigurður Þór.

Einstaklingar eru misnæmir fyrir loftmengun og eru börn viðkvæmari fyrir henni en fullorðnir en loftmengun er talin geta haft skaðleg áhrif á lungnaþroska barna.  Á Íslandi hafa heilsufarsleg áhrif loftmengunar lítt verið rannsökuð en eftirliti með loftgæðum hefur eflst með árunum. Ástand innilofts er þó ekki jafn vel þekkt og gæði útilofts.

„Í skýrslunni sem við vorum að gefa um fjöllum við líka um inniloft og þær áhyggjur sem við höfum af því t.d myglusveppamengun og fleiru. Inniloftið er eitthvað sem þarf að athuga líka,“ segir Sigurður.

Í skýrslunni eru lagðar fram ítarlegar tillögur um hvernig má bæta loftgæðin. Helsta tillagan er að sett verði á stofn loftgæðaeftirlit svo betur megi fylgjast með loftgæðum og bæta úr þeim eins og þurfa þykir.