Minningarstund við tjörnina

Fjöldi kerta var tendraður við Reykjavíkurtjörn í kvöld þegar hópur fólks kom saman til að minnast barna sem látið hafa lífið í átökunum í Sýrlandi eða eiga um sárt að binda vegna þeirra.

Á morgun eru tvö ár liðin frá upphafi átakanna sem kostað hafa að minnsta kosti 70 þúsund mannslíf. Barnaheill – Save the Children á Íslandi stóðu fyrir minningarstundinni, en álíka viðburðir fóru fram á vegum samtakanna víða um heim í dag.

Birgitta Jónsdóttir, þingmaður og baráttukona, flutti nokkur orð við tjörnina og síðan var mínútu þögn til að minnast barnanna.

„Börnin eru því miður helstu fórnarlömb þessara átaka," segir Erna Reynisdóttir, framkvæmdastjóri Barnaheilla. „Þau hafa upplifað skelfilega hluti, misst ættingja og jafnvel horft á þá deyja og við stöndum frammi fyrir því að heil kynslóð verði aldrei söm vegna þeirra hörmunga sem hún hefur gengið í gegnum. Þetta mun hafa mikil áhrif á samfélögin á þessu svæði og við sem alþjóðasamfélag verðum að gera það sem í okkar valdi stendur til að hjálpa þessu fólki og knýja á um að stríðinu ljúki."

Save the Children standa fyrir alþjóðlegri undirskriftasöfnun til að þrýsta á öryggisráð SÞ að grípa til aðgerða til að koma á friði í Sýrlandi. Þá er einnig í gangi söfnun til að standa straum af kostnaði við hjálparstarfið sem er gífurlegur að sögn Ernu.

„Það er ótvírætt neyðarástand hjá sýrlenskum börnum. Þau eru varnarlaus og hrædd og við verðum að bregðast við," segir Erna að lokum og hvetur alla til að skrifa undir áskorunina og minnir á söfnunarsímana 904 1900 og 904 2900 fyrir þá sem vilja styrkja hjálparstarfið með fjárframlögum.