Rithöfundur leiðir leikstjóra um slóðir Bobby Fischer

„Ég þarf aldrei að hugsa mig um þegar einhver vill kynnast Íslandi í gegnum skáklistina, okkar göfugu þjóðaríþrótt,“ segir skákmaðurinn og rithöfundurinn Hrafn Jökulsson, sem mun leiða sænska leikstjórann Lukas Moodysson um slóðir Bobby Fischer hér á landi. Moodysson er heiðursgestur kvikmyndahátíðarinnar RIFF í ár og hafði sérstakan áhuga á að heimsækja slóðir skákmeistarans á meðan á heimsókn hans stendur.

„Mínir góðu vinir í RIFF sögðu mér að leikstjórinn hefði áhuga á því að fara á söguslóðir skákarinnar. Það er sérlega skemmtilegt að einn besti og snjallasti leikstjóri heims skuli hugsa um skák þegar hann kemur til Íslands og sýnir hvílíkt stórveldi við erum í skákheiminum,“ útskýrir Hrafn, sem kveðst hafa lært mannganginn um það leyti er Fischer vann heimsmeistaratitilinn í Reykjavík árið 1972.

Æskilegt að niðurstaðan verði bíómynd

Hann hyggst fara með leikstjórann að leiði Fischers í Laugardælakirkjugarði og heimsækja Fischer-setrið á Selfossi. „Svo endar þetta vonandi með því að við setjumst að tafli og kannski fæ ég að spyrja hann svolítið um hans mörgu meistaraverk. Æskileg niðurstaða væri síðan sú að hann gerði bíómynd um skák á Íslandi, ég held að það steinliggi alveg.“

Aðspurður segist Hrafn þekkja nokkuð til verka Moodyssons, sem hefur leikstýrt myndum á borð við Fucking Åmål, Tillsammans og Ett hål i mitt hjärta. „Það er virkilega gaman að hann skuli vera að koma á RIFF og heiðra okkur með nærveru sinni, þessi mikli snillingur,“ segir hann að lokum.

Bobby Fischer lést þann 17. janúar árið 2008, Lukas Moodysson fæddist sama dag árið 1969.

Kvimyndin Tillsammans eftir Lukas Moodysson sló rækilega í gegn þegar hún kom út árið 2000.