Þarf viðhorfsbreytingu til drykkju framhaldsskólanema

Góður árangur í forvarnarstarfi í grunnskólum hefur skilað góðum árangri, en vandinn er sá að aðeins hefur tekist að seinka neyslunni, segir Viðar Halldórsson, félagsfræðingur hjá Rannsóknum & greiningu.

„Áfengisneyslan hefur snarminnkað í grunnskólunum síðustu ár, en vandinn er sá að það er búið að seinka neyslunni þar til krakkarnir fara í framhaldsskóla,“ segir Viðar. Hann mun halda erindi um forvarnir á foreldradegi Heimilis og skóla sem haldinn verður á föstudag í Menntaskóla Borgarfjarðar.

Hann segir að þeir sem unnið hafi gott forvarnarstarf í grunnskólum landsins á undanförnum árum og áratugum þurfi nú í auknum mæli að beina kröftunum að ungu fólki á framhaldsskólaaldri.

„Viðhorf foreldranna breytast mikið þegar krakkarnir fara í framhaldsskóla. Þeir líta frekar svo á að það sé í lagi að drekka áfengi þegar krakkarnir eru komnir í menntaskóla,“ segir Viðar.

Hann segir börnin skynja þessa viðhorsbreytingu foreldra sinna og hún hafi áhrif á þau. „Þegar þau koma í framhaldsskóla koma þau inn í nýjan veruleika þar sem þetta virðist vera í lagi.“

Hann segir þörf á viðhorfsbreytingu til ungs fólks í framhaldsskólum. „Þó krakkarnir fari í framhaldsskóla eigum við ekki að gefa okkur að allt breytist, og að þetta sé tímapunkturinn sem þetta sé orðið í lagi,“ segir Viðar.

Hann segir að góður árangur hafi náðst í að seinka því að grunnskólakrakkar byrji að drekka áfengi, og nú sé verkefnið að seinka því að framhaldsskólanemar byrji að drekka. Rannsóknir sýni að því eldra sem fólk sé þegar það byrji að drekka áfengi, því minni líkur séu á því að það lendi í vandræðum með neysluna.

Ekki íþróttirnar sem hafa forvarnaráhrif

Rannsóknir á áhrifum íþróttaiðkunar á áfengisneyslu ungs fólks benda til þess að það sé ekki íþróttaiðkunin sem slík sem hefur forvarnargildi, heldur velti það á skipulagi íþróttastarfseminnar, segir Viðar Halldórsson, félagsfræðingur hjá Rannsóknum & greiningu.

Forvarnaráhrifin koma eingöngu af skipulögðu félagsstarfi þar sem hefðir, saga, reglur, þjálfarar og foreldrastarf vinna saman, segir Viðar. Hann segir að þeir sem eru í óskipulögðum íþróttum séu jafnvel líklegri en jafnaldrarnir til að neyta áfengis. Dæmi um óskipulagðar íþróttir eru ferðir á líkamsræktarstöðvar, skíðasvæði eða bara á körfuboltavöll með vinunum þar sem ekki er formleg umsjón með íþróttaiðkuninni.