Vandinn sagður rista djúpt

Kynferðisofbeldi á Indlandi hefur verið mikið til umfjöllunar undanfarna mánuði, en það var hrottaleg hópnauðgun í strætisvagni í Delí sem vakti þá alheimsathygli sem enn stendur yfir. Árásin endaði með því að þolandinn, hin 23 ára Jyoti Singh, lést af sárum sínum.

Í gær var svo greint frá handtöku tveggja manna sem grunaðir eru um að hafa rænt fimm ára stúlku í Delí, haldið henni nauðugri í þrjá daga og nauðgað henni ítrekað.

Mótmæli vegna kynferðisárása hafa verið tíð undanfarið en Bhagyashri Dengle hjá barnaverndarsamtökunum Plan India segir að þrátt fyrir alla umfjöllunina og mótmælin hafi enn ekkert breyst. Hún segir vandann rista djúpt og segir að ástandið muni ekki breytast á einni nóttu.

Dengle nefnir framgöngu lögreglumanns í mótmælum síðasta föstudag sem náðist á myndbandsupptöku þar sem hann sló og hrinti kvenkyns mótmælanda. Hún segir það merki um að vitundarvakning hafi ekki enn átt sér stað fyrst að lögreglumaður komi þannig fram.

„Börn eru enn berskjaldaðri og margar stúlkur upplifa óöryggi við það eitt að nota almenningssalerni eða ganga heim úr skólanum, þar sem karlmenn stríða þeim og áreita þær,“ segir Dengle, og bætir því við að sumir foreldrar hafi brugðið á það ráð að halda dætrum sínum heima.

Vikulegar fréttir af hryllilegu ofbeldi

„Því miður hefur hugarfarið ekki breyst,“ segir Poonam Muttreja, yfirmaður hjá kvenréttindasamtökunum Population Foundation of India. „Hvorki hjá almenningi, lögreglu eða stjórnmálamönnum.“

Undanfarið hafa birst vikulegar fréttir í indverskum dagblöðum af hryllilegu kynferðisofbeldi þar í landi. Meðal þeirra er frétt af unglingsstúlku sem nauðgað var af föður sínum, nítján ára pilti sem nauðgaði tólf ára fatlaðri stúlku, og karlmanni sem skvetti sýru á kynfæri eiginkonu sinnar.

Fyrr í þessum mánuði samþykkti forseti landsins herðingu á refsilöggjöf í nauðgunarmálum, en meðal annars gera lögin dómstólum það kleift að dæma síbrotamenn í kynferðisbrotamálum til dauða. Einnig eru nú harðari viðurlög við sýruárásum og mansali.

„Yfirvöld hafa brugðist skjótt við en þetta er einungis lítill hluti af því sem þarf að gera,“ segir Manmohan Singh, forsætisráðherra landsins. „Árásin á litlu stúlkuna minnir okkur enn og aftur á að við þurfum öll að leggjast á eitt til þess að losna við þessa úrkynjun úr samfélagi okkar.“

Samkvæmt tölum frá mannréttindasamtökum jukust nauðganir á börnum úr rúmlega tvö þúsund í rúmlega sjö þúsund á árunum 2001 til 2011. Þá upplifa 95% indverskra kvenna óöryggi á almenningsstöðum