Flugvél Icelandair snúið við - hægri hreyfillinn bilaði

Flugvél Icelandair sem var á leið frá Glasgow til Íslands var snúið við eftir um hálftíma langt flug. Kristófer Helgason, útvarpsmaður á Bylgjunni var um um borð. „Það kom tilkynning aftur í vél: „Mayday mayday, right engine down“ (ísl.  Mayday mayday, slökkt á vél hægra megin),“ segir hann.

„Ég efast um að farþegarnir hafi átt að heyra þessa tilkynningu en talsverð hræðsla varð meðal farþeganna við að heyra þetta.“

Magnús Agnar Magnússon var einnig um borð. „Flugstjóri vélarinnar tilkynnti farþegum um að ljós í mælaborðinu virkuðu ekki og gaf til kynna að bilun væri í gangi,“ segir Magnús. „Um tíu mínútum síðar kom í ljós að hreyfill öðru megin væri farinn.“

Þeir segja báðir að talsverð hræðsla hafi verið meðal farþeganna en starfsfólkið hafi staðið sig mjög vel. „Við fundum ekkert fyrir þessu og ef tilkynningin hefði ekki komið hefði ég ekkert orðið var við þetta,“ segir Magnús.

Kristófer sagðist hafa fengið þær upplýsingar að flugvélar af þeirri gerð sem þau voru um borð í væru gerðar til þess að fljúga á öðrum hreyflinum.  Það væru stjarnfræðilega litlar líkur á því að hinn hreyfillinn færi líka.

„Maður fann samt að það var smá stress hjá flugstjóranum og flugfreyjunum enda víst ekki oft sem svona kemur upp á,“ segir Kristófer.

Lendingin gekk vel og allt gekk hnökralaust fyrir sig. „Auðvitað er þetta óþægilegt og það var mikið spennufall þegar vélin lenti,“ segir hann.

Magnús er umboðsmaður knattspyrnumanna á Íslandi og segir að í fimm mínútur hafi landsleikurinn við Króatíu næsta þriðjudag ekki skipt neinu máli. „En hann er farinn að skipta máli aftur,“ segir hann.