Borgarráð samþykkir sölu á Magmabréfi

Borgarráð hefur staðfest ákvörðun stjórnar Orkuveitu Reykjavíkur um að taka 8,6 milljarða króna tilboði í skuldabréf í eigu fyrirtækisins sem Magma gaf út árið 2009. Fjórir fulltrúar Besta flokksins og Samfylkingar greiddu atkvæði með sölunni. Þrír fulltrúar minnihlutans voru á móti.

Ekki hefur fengist upplýst hver stendur að baki tilboðinu. „Nú hagar því þannig til að það er leynd af fjárhagi þessarar sölu, enda Orkuveitan skráð á markaði, ég get því ekki rætt þetta þannig," segir Haraldur Flosi Eiríksson, stjórnarformaður Orkuveitunnar, í samtali við Vísi í morgun.

Spurður hvort þetta sé ekki óheppileg staða að útsvarsgreiðendur fái ekki upplýsingar um málið, svarar hann:

„Þetta er það umhverfi sem löggjafinn hefur sett okkur og ég hef ekkert um það að segja í sjálfu sér."

Kjartan Magnússon, borgarfulltrúi Sjálfstæðisflokksins, gagnrýndi tímasetningu sölunnar, en álverð er með því lægsta þessa dagana og vill hann meina að um hálfgerða hraksölu sé að ræða.