"Þetta bara má ekki“

„Þetta er fínt app hjá honum og við erum ekki að setja neitt út á það sem slíkt, en vörumerkið er Strætós,“ segir Reynir Jónsson, framkvæmdastjóri Strætó bs. sem krefst þess að höfundur smáforritsins Strætó breyti nafni þess.

Árni Jónsson er höfundur forritsins og átti það að auðvelda strætófarþegum að fylgjast með áætlun vagnanna. Forritið mátti sækja ókeypis, en nú hefur Árna borist bréf frá lögfræðingum Strætó bs. þar sem þess er krafist að hann hætti nota nafnið og rauntímaupplýsingar um ferðir vagnanna.

„Það að við höfum eitthvað verið að fjargviðrast út í hann þegar hann setti út þetta app, ég kannast nú bara ekki við það,“ segir Reynir og segist ekki hafa hugmynd um það hver hafi gert það fyrir þeirra hönd. „En við fórum í skráningu á þessu, það er ekkert leyndarmál, og við fengum hana viðurkennda.“

Árni svaraði ekki

Reynir segir að ítrekað hafi verið reynt að ná í Árna símleiðis vegna forritsins en það hafi ekki borið árangur, hann hafi einfaldlega ekki svarað.

„Við þurftum á endanum að fara bara í Þjóðskrá og finna heimilisfangið þar og það var eina ráðið okkar, að senda honum þetta bréf.“

Reynir segir Strætó vera vörumerki þó það hafi ekki verið skráð fyrr.

„Þetta væri svipað og ef ég myndi stofna lítið blað og kalla það Fréttablaðið. Ég er nú alveg viss um það að þið kæmuð á eftir mér, þannig er það bara. Svo getur hann svo sem sagt að okkar app hafi fengið dræmar viðtökur. Ég veit ekki hvernig hann mælir það,“ segir Reynir og bætir því við að app Strætó bs. hafi verið sótt um 30 þúsund sinnum.

„Þetta bara má ekki“

„Staðreyndin er sú að við teljum okkur eiga tilkall til þessa nafns þó við séum opinber aðili. Þegar okkar viðskiptavinir hringja í þjónustuver okkar til þess að kvarta undan hans appi, þá er fólk greinilega að ruglast á þessu. Hann forritar appið sitt á móti vefsíðunni okkar, en það er ólöglegt. Þetta er svipað því að afrita bók án leyfis. Hann ber fyrir sig að það sé enga skilmála að finna á vefsíðunni okkar. Það eru bara almenn lög um höfundarétt sem gilda í þessu sambandi,“ segir Reynir og að auðvitað  geti það vel verið að Árni hafi einfaldlega ekki vitað það, en það sé hins vegar ekki afsökun.

„Það er engum heimilt að stela upplýsingastreymi annars aðila, eða nota það án samþykkis viðkomandi. Þetta bara má ekki.“

Frestur Árna til að verða við kröfum Strætó bs. er liðinn og aðspurður hvert næsta skref verði segist Reynir ekki vita það.

„Ég bara veit það ekki ef ég á að segja alveg eins og er. Ég fól málið bara þessum lögmanni og hann rekur málið fyrir okkar hönd. Menn verða auðvitað að bregðast við, og ef ekki verðum við eflaust að grípa til einhverra frekari aðgerða, við höfum bara ekki rætt það satt best að segja.“