Hætt við að skilja í annað skipti

Foreldrar Miley Cyrus, Billy Ray Cyrus og Tish Cyrus, eru hætt við að skilja en þetta er í annað sinn á þremur árum sem hjónin hætta við skilnaðinn.

Billy Ray sótti um skilnað frá eiginkonu sinni árið 2010 en dró hann til baka nokkrum mánuðum síðar. Þá sótti Tish um skilnað í júní síðastliðnum og sagði ástæðuna vera óásættanlegan ágreining á milli þeirra hjóna. Hjónin hafa nú hætt við allt saman og eru þegar byrjuð í hjónabandsráðgjöf.

„Ég ræddi við Tish og hún sagði mér að það hefði runnið upp fyrir þeim að þau væru ástfangin og að þau vildu ekki skilja. Þau fóru nýverið í hjónabandsráðgjöf, eitthvað sem þau hafa aldrei gert í þau 22 ár sem þau hafa verið saman. Það virðist hafa hjálpað því þau eru mun nánari nú,“ sagði fréttamaður sjónvarpsstöðvarinnar E! og mikill vinur hjónanna, Ken Baker.