Innlent

Alvarlegt slys í Esju

Bíll björgunarsveitar á leið á staðinn.
Bíll björgunarsveitar á leið á staðinn.
Slökkvilið og björgunarsveitir eru nú að störfum í Esju þar sem orðið hefur alvarlegt slys.

Samkvæmt upplýsingum frá fulltrúa slökkviliðs hrapaði kona í fjallinu suður undir Hábungu. Þyrla Landhelgisgæslunnar kemst ekki á loft sökum slakra veðurskilyrða en er í viðbragðsstöðu.

Engar upplýsingar liggja fyrir um meiðsli konunnar að svo stöddu.



Uppfært klukkan 16:18

Björgunarfólk er enn á leið á staðinn og sækist hægt vegna veðurs. Konan var hluti af þriggja manna gönguhóp sem sjálfur var hluti af stærri hóp. Sá hópur er nú kominn niður, en þrímenningarnir bíða að sögn slökkviliðsins í þó nokkurri hæð.



Uppfært klukkan 16:55

Fyrstu fjallabjörgunarmenn eru nú að nálgast staðinn þar sem konan hrapaði en verulega erfiðar aðstæður eru á staðnum og sækist leiðin hægt enda um kletta með ís og snjó að fara. Samkvæmt upplýsingum frá Landsbjörgu er búið að senda um 25 fjallamenn á staðinn auk þess sem verið að reyna að komast nálægt staðnum á tveimur vélsleðum, þremur fjórhjólum og snjóbíl. Ólíklegt er þó að þessi tæki komist nálægt staðnum.

Í viðbót við þetta eru um tuttugu aðrir björgunarveitarmenn í biðstöðu við rætur Hátinds tilbúnir til að fara upp til aðstoðar ef á þarf að halda. Á þessari stundu er ekkert nánar vitað um ástand þess sem hrapaði. Í viðbót við erfiðar aðstæður á staðnum er mjög slæmt veður, snjókoma, hvasst og skyggni innan við eitt hundrað metrar.



Mest lesið


Fleiri fréttir

Sjá meira


×

Mest lesið