Eigum mjaltaþjónaheimsmet

Hvergi í heiminum er hlutfall mjólkur frá svonefndum mjaltaþjónabúum meira en hér á landi, að því er fram kemur hjá Landssambandi kúabænda.

Vísað er í nýbirtar tölur um að hlutfallið hér hafi í fyrra verið 29,7 prósent af heildarinnvigtun mjólkur, eða 37,2 milljónir mjólkurlítra. „Ekkert annað land í heiminum kemur nálægt Íslandi á þessu sviði, en næst á eftir eru þó dönsk kúabú með um 26 til 27 prósent mjólkurinnar frá mjaltaþjónabúum,“ segir í umfjöllun á naut.is. Þar kemur jafnframt fram að um síðustu áramót hafi 105 kúabú notað mjaltaþjóna og hafi fjölgað um fjögur á árinu.