Áfram stormur við Suðurströndina

Enn er stormur við Suðurströndina og er spáð að svo verði í dag.

Tvö flutningaskip, sem fóru fyrir Reykjanesið í nótt, sigla nú á móti veðrinu á aðeins tveggja hnúta hraða en væru á 11 til 12 hnúta hraða við eðlilegar aðstæður. Skip sem eru að koma að austan, eru hinsvegar á blússandi siglingu undan veðrinu.

Klukkan þrjú í nótt mældust austan 32 metrar á sekúndu á Stórhöfða og upp í 39 í hviðum, þannig að óljóst er hvort Herjólfur kemst í fyrri ferðina. Skipið hefur ekki getað siglt í tvo daga og gámaskip Eimskips og Samskipa, sem hafa viðkomu í Eyjum, hafa ekki komist þar inn, þannig að farið var að bera á vöruskorti í matvöruverslunum í Eyjum í gær.