Norðmenn freista þess að fyrirbyggja skotárásir í skólum

Nýjar leiðbeiningar til að fyrirbyggja alvarlega atburði á borð við skotárásir verða sendar öllum skólum og barnaheimilum í Noregi. Í frétt um málið á vef Ríkislögreglustjóra kemur fram að leiðbeiningarnar um viðbrögð við slíkum voðaverkum verði tilbúnar næsta vetur.

Þannig hefur áætlun Norðmanna frá 2009 verið uppfærð en sú áætlun átti rætur að rekja til skotárásar í skóla í Kauhajoki í Finnlandi árið áður þar sem níu nemendur og einn kennari voru myrtir.

Menntamálaráðuneyti Noregs og dómsmálaráðuneytið ákváðu í desembermánuði að nauðsynlegt væri að uppfæra fyrri áætlanir. Sú ákvörðun var tekin fjórum dögum eftir að byssumaður myrti 20 börn og sex starfsmenn í barnaskóla í Newtown í Connecticut í Bandaríkjunum.

Stefnt er að því að fyrir liggi áætlun um viðbrögð og viðbúnað vegna „alvarlegra skólaatvika" í hverjum skóla í Noregi. Að auki verður hugað sérstaklega að fyrirbyggjandi aðgerðum.