Engar athugasemdir gerðar við sameiningu WOW og Express

Samkeppniseftirlitið gerir ekki athugasemdir við samruna WOW Air og Iceland Express, en fjallað er um samrunann í ákvörðun sem Samkeppniseftirlitð birti í dag.

Í ákvörðun Samkeppniseftirlitsins segir að athugun leiði í ljós mikla yfirburði Icelandair í áætlunarflugi til og frá Íslandi. Skipti þar mestu máli mjög há markaðshlutdeild félagsins og jafnvel einokun á nokkrum af helstu áætlunarleiðum til og frá landinu. Leiðarkerfi Icelandair sem feli í sér tengiflug milli áfangastaða í Evrópu og Norður-Ameríku veiti félaginu einnig mikið markaðsforskot. Í því sambandi hafi áhrif að flugmálayfirvöld hér á landi hafi veitt Icelandair forgang að mikilvægustu afgreiðslutímum í Keflavíkurflugvelli. Þessi forgangur skapi Icelandair sterka stöðu og geri nýjum aðilum t.a.m. mjög erfitt um vik að hefja tengiflug til Norður-Ameríku.

„Athugun Samkeppniseftirlitsins á flugmarkaðnum leiðir til þeirrar niðurstöðu að ekki sé ástæða til að aðhafast vegna samruna WOW Air og Iceland Express. Telur eftirlitið að með samrunanum sé ekki að verða til markaðsráðandi staða sameinaðs fyrirtækis, styrking á slíkri stöðu eða að samkeppni raskist verulega. Á þetta við jafnvel þó talsverð samþjöppun verði vegna samrunans á einstökum áætlunarleiðum, t.d. í flugi milli Keflavíkur og Berlínar. Í þessu sambandi skipta yfirburðarstaða Icelandair og önnur atriði sem rakin eru í ákvörðun þessari miklu máli," segir í ákvörðun Samkeppniseftirlitsins.