„Öfgafemínistar“ skemmta sér

Femínistafélag Íslands er tíu ára um þessar mundir og fagnar afmælinu í kvöld, en í dag er alþjóðlegur baráttudagur kvenna haldinn hátíðlegur.

Afmælisveislan er haldin í húsakynnum Kvenréttindafélags Íslands við Túngötu, en veisluna kallar félagið „öfgafemínistapartý".

Steinunn Rögnvaldsdóttir, talskona félagsins, segir alla femínista velkomna í partýið og segir nafnið augljóst háð. „Við köllum þetta öfgafemínistapartý til að gera grín að orðanotkun andfemínista um að það sé svo sérstaklega öfgafullt að berjast fyrir jafnrétti kynjanna."

Félagið hvetur fólk til að mæta á baráttufund í Iðnó sem hefst klukkan 17 í dag, en þar verður Steinunn meðal þeirra sem taka til máls. Fundurinn er á vegum Menningar- og friðarsamtaka íslenskra kvenna en partý Femínistafélagsins er að sögn Steinunnar „bara skrall".

„Við ætlum að kynna afmælisdagskrána, sem stendur yfir út mánuðinn, en síðan ætlum við bara að skemmta okkur. Femínistadjömm eru langskemmtilegustu djömm sem hægt er að fara á og það er bara dásamlegt að koma saman og gleðjast með fólki sem er lifandi og aktíft í baráttu fyrir góðum hlutum."

Steinunn segir kynjahlutfallið í samkomum sem þessari stórlega konum í vil, en það séu alltaf nokkrir skemmtilegir strákar sem láti sjá sig. Og ef fólk er forvitið um félagið og félagsskapinn segir Steinunn tilvalið að það mæti í partýið.

„Allir sem vilja taka þátt í femínískri baráttu eru velkomnir á þennan atburð sem og aðra á vegum félagsins."