Þingkonur ræða jafnréttismál í Jónshúsi

„Hrun og heimsmet í kynjajafnrétti? Femínisminn - fimm árum síðar" er yfirskrift erindis sem dr. Þorgerður Einarsdóttir flytur á baráttusamkomu í Jónshúsi í Kaupmannahöfn í kvöld. Á eftir ræða fjórar þingkonur stöðu kynjajafnréttis á Íslandi.

Baráttusamkoma íslenskra kvenna er árlegur viðburður í Kaupmannahöfn. Kosið verður til Alþingis í vor og í því tilefni flytur dr. Þorgerður Einarsdóttir, prófessor í kynjafræði við Háskóla Íslands, erindi kvöldsins „Hrun og heimsmet í kynjajafnrétti? Femínisminn - fimm árum síðar". Þar fer hún yfir þróun jafnréttismála og metur stöðuna.

Að því loknu ræða fjórar þingkonur, þær Álfheiður Ingadóttir, Katrín Júlíusdóttir, Vigdís Hauksdóttir og Þorgerður Katrín Gunnarsdóttir, hvað áunnist hefur í jafnréttismálum á undanförnum árum og hver þær telji brýnustu viðfangsefnin á næsta kjörtímabili. Þá mun Brynhildur Björnsdóttir mæta fyrir hönd Bjartrar framtíðar.

Íslenski kvennakórinn í Kaupmannahöfn stendur fyrir söng og sér um veitingasölu, segir í tilkynningu vegna viðburðarins. Í boði verða bökur, salat og drykkir.

Veitingasala Jónshúss opnar kl. 18.30 en dagskráin hefst kl. 19.30.