"Tökum til fullra varna“

Steingrímur J. Sigfússon atvinnuvega- og nýsköpunarráðherra segir að það komi ekki til greina að heimila innflutning á hráu kjöti hingað til lands. Nýverið komst ESA að því að bann Íslands við innflutningi á hráu kjöti standist ekki EES-samninginn og gæti málið endað fyrir dómstólum. Steingrímur segir að hann taki til fullra varna ef til þess kemur.

Deilan snýst um íslensk lög um innleiðingu á reglugerðum Evrópusambandsins um matvæli og fóður, sem skuldbinda Íslendinga til þess að leyfa innflutning á hráu kjöti. Skuldbindingin var felld út úr frumvarpinu áður en það varð að lögum. Árið 2011 sendu Samtök verslunar og þjónustu kvörtun til Eftirlitsstofnunar EFTA, ESA, vegna málsins. Hún hefur nú komist að þeirri niðurstöðu að bannið standist ekki EES-samninginn.

Steingrímur J. Sigfússon atvinnuvega- og nýsköpunarráðherra segir að það komi ekki til greina af sinni hálfu að auka heimildir til innflutnings á hráu kjöti.

Íslendingar hafa frest til loka maí til að gera betur grein fyrir afstöðu sinni. Fallist ESA ekki á rök Íslands gæti málið fari fyrir EFTA dómstólinn. Rætt var við Steingrím í kvöldfréttum Stöðvar 2.