Hefur enn ekki skilað umsögn um sjálfsvíg

Landlæknisembættinu hefur enn ekki borist greinargerð frá Sjúkrahúsinu á Akureyri um sjálfvíg sjúklings. Embættinu ber að skoða málið en rannsókn tefst sökum þessa. Faðir sjúklings segir þjónustuna á Norðurlandi fyrir neðan allar hellur.

Landlæknisembættinu hefur enn ekki borist greinargerð frá forsvarsmönnum geðdeildar Sjúkrahússins á Akureyri varðandi sjálfsvíg sjúklings á deildinni í október síðastliðnum. Embættið ítrekaði beiðnina í janúar, en hefur enn ekki fengið svör. Samkvæmt lögum ber Landlækni að rannsaka öll óvænt atvik sem koma upp innan heilbrigðisstofnana, en rannsóknin á sjálfsvíginu á Akureyri hefur tafist vegna greinargerðarinnar.

Fréttablaðið greindi frá því í gær að í úttekt Landlæknis á Sjúkrahúsinu á Akureyri komi fram að aðbúnaður sjúklinga á geðdeildinni sé óviðunandi og óforsvaranlegur. Starfsfólk óttist um öryggi sjúklinga, mannekla sé mikil og álag viðvarandi. Biðlistar lengjast stöðugt og eftirspurn eftir þjónustu hefur aukist jafnt og þétt undanfarin ár, þá sér í lagi eftir lokun dagdeildar árið 2010.

Tveir inniliggjandi sjúklingar hafa framið sjálfvíg inni á geðdeild sjúkrahússins undanfarin tvö ár og er Landlæknir með það síðara í skoðun, eins og fyrr segir.