Áfram slæmt ferðaveður víða á landinu

Áfram er búist við slæmu ferðaverði víða á landinu vegna slyddu, snjókomu og skafrennings. Þetta kemur fram í tilkynningu frá Almannavörnum.

Veðurspá: Austan 13-23 m/s, hvassast við suðurströndina en 10-15 m/s norð- og austanlands. Víða snjókoma og rigning syðst, en úrkomulítið fyrir norðan í dag.

Hiti 0 til 5 stig á Suðurlandi- og Suð-Vesturlandi, hlýjast við ströndina, annars 0 til 5 stiga frost.

Á höfuðborgarsvæðinu er búist við austan 10-18 m/s og slyddu, hvassast á Kjalarnesi. Hiti 0 til 3 stig.

Hvasst er undir Hafnarfjalli, undir Eyjafjöllum, við Reynisfjall og í Öræfum ná hviður yfir 30m/s. Vegfarendur þurfa að fylgjast vel með upplýsingum um veður og færð sem verða uppfærðar reglulega í dag.

Fjallvegir á Vestfjörðum eru margir ófærir og verður kannað með opnun þeirra í birtingu. Öxnadalsheiði er ófær en unnið að mokstri. Víða er þæfingur eða þungfært.