Fær átta og hálfa milljón í bætur vegna alvarlegs umferðarslyss

Hæstiréttur Íslands staðfesti dóm Héraðsdóms Reykjavíkur um að dæma Höldur ehf. og Vátryggingafélag Íslands til þess að greiða bónda átta og hálfa milljón króna í miskabætur vegna tjóns sem hann varð fyrir í október árið 2006.

Maðurinn varð fyrir líkamstjóni í umferðarslysi er bifreið ók á hann úti á þjóðvegi þar sem hann hafði stöðvað dráttarvél sína með tengivagni í þeim tilgangi að færa fé af tengivagninum yfir í fjárflutningavagn til að því yrði komið til slátrunar.

Krafði hann Höldur ehf. og Vís um skaðabætur vegna tjónsins en Höldur ehf. var skráður eigandi bifreiðarinnar sem var tryggð ábyrgðartryggingu hjá Vís. Fyrir Hæstarétti deildu aðilar annars vegar um það hvort maðurinn ætti sjálfur að bera hluta af tjóni sínu vegna meðábyrgðar á slysinu og hins vegar hvort hann gæti krafist bóta vegna útlagðs kostnaðar við að leigja íbúð meðan gerðar voru breytingar á íbúðarhúsi hans vegna þeirrar fötlunar sem hann varð fyrir, en maðurinn er lamaður fyrir neðan mitti í dag.

Hæstiréttur taldi bóndann meðábyrgan að slysinu vegna stórkostlegs gáleysis hans, en hann stöðvaði dráttarvagninn á afleggjara á þjóðveginum. Það þótti hins vegar ekki efni til að láta hann bera sjálfan hluta af tjóni sínu þar sem ökumaður bifreiðarinnar hefði ekið allt of hratt miðað við aðstæður umrætt sinn og ekki í samræmi við reglur umferðarlaga.

Þá féllst Hæstiréttur á það með héraðsdómi að bóndinn gæti krafist bóta vegna kostnaðar við leigu íbúðar meðan gerðar voru umfangsmiklar breytingar á heimili hans vegna fötlunar.