Þriðji Víetnaminn lýkur BA í íslensku

Lieu Thúy Thi Ngo kom til Íslands frá Víetnam þegar hún var 25 ára til að læra íslensku. Nú er hún 29 ára, og í febrúar lýkur hún BA gráðu í íslensku fyrir erlenda stúdenta. Hún verður þriðji nemandinn frá Víetnam sem útskrifast úr þessu námi.

BA verkefnið hennar er að þýða barnabókina Allt getur gerst eftir Auði Jónsdóttur. Lieu stefnir að því að fá bókina útgefna fyrir víetnömskumælandi börn á Íslandi.

„Það var ekki einfalt að þýða bókina, get ég sagt, þó að þetta sé barnabók. Stundum var eitthvert orð ekki til í víetnömsku, svo ég þurfti að nota annað orð, finna jafngildi þess, eða útskýra orðið.

Til dæmis er skyr ekki til á víetnömsku. Við eigum jógúrt en ekki skyr, svo ég þurfti að nota orðið jógúrt og útskýra smá fyrir neðan.“

Í viðtali við Vísi segir Lieu frá áskorunum í tungumálanáminu. Í íslenskunáminu þurfti hún til dæmis að læra að bera fram marga samhljóða sem koma hver á eftir öðrum, en í víetnömsku eru það frekar sérhljóðar sem standa margir saman í röð.

Framburður orða eins og strætó vafðist fyrir henni til að byrja með. Framburður nafnsins hennar gengur heldur ekki vandræðalaust fyrir Íslendinga, því í því eru margir sérhljóðar í röð. Þegar hún vann á veitingastaðnum Horninu kallaði hún pítsu „pissa,“ og þá var mikið hlegið.

„Íslendingar eiga það til að tala mjög hratt, sem er erfitt fyrir útlendinga,“ segir hún. Hún segir að beygingakerfið hafi líka verið svolítið flókið. „Föll eru ekki til í víetnömsku.“ Í víetnömsku eru hinsvegar tónar.

„Ég held að ykkar mál sé líka með tóna. Ég held það. Hjá okkur eru sex mismunandi tónar sem þarf að læra. En hjá ykkur er til dæmis mikil áhersla á fyrsta atkvæðið, og tónninn fer aðeins upp í lok spurningar.“

Lieu giftist Íslendingi í fyrrasumar. Brúðkaupið var að heiðnum sið. „Maðurinn minn er heiðinn og ég er kannski líka heiðin. Ég er ekki kristin og ekki búddisti.“ Fjölskylda hennar í Víetnam iðkar búddatrú, en hún trúði ekki sjálf.