Óttast að grunnskólaframkvæmdir valdi þenslu á Siglufirði

Iðnaðarmenn í Fjallabyggð hafa sent bæjarstjórn Fjallabyggðar undirskriftalista þar sem þeir skora á bæjarstjórn að fresta fyrirhugaðri viðbyggingu á Grunnskóla Fjallabyggðar sem til stendur að reisa í byrjun næsta árs.

Ástæða áskorunarinnar er sú að að iðnaðarmenn eru uppteknir við framkvæmdir á Hótel Rauðku sem mun rísa á Siglufirði en þeir telja að framkvæmdatími þessara verka muni skarast og því eigi þeir ekki möguleika á að starfa við við bæði verkin. Iðnaðarmennirnir hafa áhyggjur af því að óbreytt verkefnastaða muni valda mikilli þenslu á skömmum tíma og hvetja því bæjarstjórn til að jafna út álagið og fresta skólaframkvæmdum.

Framkvæmdir á svokölluðum grunnskólareit á Þórmóðseyri á Siglufirði hafa verið umdeildar en bæði deiliskipulag og byggingarleyfi fyrir viðbyggingu skólans var kært til úrskurðarnefndar umferfis- og auðlindamála. Úrskurðarnefndin hafnaði ógildingu og var málið tekið fyrir á fundi bæjarstjórnar 12. desember síðastliðinn.

Tillaga um frestun framkvæmda felld

Í framhaldi af niðurstöðu úrskurðarnefndar fól bæjarráð bæjarstjóra að bjóða verkið út hið fyrsta. Í upphafi umfjöllunar las forseti bæjarstjórnar áskorun iðnaðarmanna og í kjölfarið lagði bæjarfulltrúi framsóknarmanna, Sólrún Júlíusdóttir, fram tillögu þess efnis að öllum framkvæmdum við Grunnskólann yrði frestað og málinu yrði vísað til bæjarráðs til frekari skoðunar. Sú tillaga var hins vegar felld með fimm atkvæðum gegn þremur.

Sólrún hefur áhyggjur af þensluáhrifum framkvæmdanna og segir að þrátt fyrir að verk séu boðin út á landsvísu, þá hafi reynslan verið sú að sótt hafi verið í undirverktaka í heimabyggð. Sveitarfélög eigi alls ekki að ýta undir of mikla þenslu á skömmum tíma þegar einkaaðilar séu tilbúnir til framkvæmda.

„Ég tel að sveitarfélagið eigi ekki að fara í stórframkvæmd, meðan einkaaðili er tilbúinn að fara í svo kostnaðarsama framkvæmd. það eru ekki öll sveitarfélög sem eru svo heppin að hafa einkaaðila sem tilbúinn er að fjárfesta fyrir einn og hálfan milljarð í framkvæmdum á svæðinu," segir Sólrún. Hún vísar þar til athafnamannsins Róberts Guðfinnssonar sem hefur fjárfest umtalsvert á svæðinu, meðal annars í ferðaþjónustu og í kringum líftæknifyrirtækið Genis.



Bæjarstjóri segir einungis verið að uppfylla lögboðnar skyldur



Sigurður Valur Ásbjarnarson er bæjarstjóri Fjallabyggðar. Hann segir sveitarfélagið eingöngu vera að uppfylla lögbundnar skyldur með því að klára framkvæmdirnar.

„Skólabyggingin sem um ræðir er að rúmmáli og flatarmáli um það bil 15% af þeirri framkvæmd sem hún rekst á við. þessi framkvæmd er því ekki stór í sniðum. það breytir því ekki að menn hafi áhyggjur af þensluáhrifum. Það hefur verið markmið þessarar bæjarstjórnar frá kosningum að sameina skólabyggingar úr tveimur í eina, bæði á Ólafsfirði og Siglufirði. Með þessari framkvæmd er þeim markmiðum náð og grunnskólinn í Fjallabyggð verður því í sama dúr og önnur sveitarfélög eru með sína skóla," segir Sigurður.