Gagnrýnir forsendur dómsins gegn lögreglumanninum

Lögreglumaður var í dag dæmdur í Héraðsdómi Reykjavíkur fyrir líkamsárás í opinberu starfi eftir að hafa farið offari í handtöku á konu á Laugavegi í sumar. Lögreglumaðurinn hyggst áfrýja dómnum.

Lögreglumaðurinn var dæmdur til að greiða 300 þúsund krónur í sekt fyrir brotið. Á myndbandi sem náðist af atvikinu sést þegar konan kom upp að hlið bílsins og hrækti hún á lögreglumanninn sem ók lögreglubifreiðinni. Hann fór í kjölfarið út úr bílnum, greip í konuna sem skall á bekk og þaðan í jörðina. Hún var handjárnuð og færð í lögreglubílinn.

Lögreglumaðurinn bar því við í dómi að aðferðin sem hann beitti hafi verið sú vægasta sem völ var á. Konan var dæmd í 30 daga skilorðsbundið fangelsi í október fyrir brot gegn valdstjórninni. Lögreglumanninum var vikið frá störfum meðan á rannsókn málsins stendur yfir. Verjandi mannsins telur þó að ferli hans hjá lögreglunni sé ekki lokið.

„Það er fjöldinn allur af dæmum, bæði nýjum og gömlum, þar sem að lögreglumenn hafa fengið áþekka dóma og þeir eru starfandi í dag,“ segir Grímur Hergeirsson, lögmaður. Hann er ósáttur við dóminn og segir dómara gefa sér undarlegar forsendur.

„Dómarinn virðist leggja aðaláherslu á það að konan hafi verið svo ölvuð að það hafi ekki mátt handtaka hana með þessum hætti.“

Eðlilegt að dómstólar dæmi í vafamálum

„Það er eðlilegt að dómstólar leggi mat á það hvort að lögreglumenn fari út fyrir valdsvið sitt,“ segir Kolbrún Benediktsdóttir saksóknari. „Lögreglumenn hafa ákveðna heimild til valdbeitingar og það er viðurkennt að þeir hafi svigrúm þegar þeir eru að vinna sína vinnu. Það er líka eðlilegt að það séu dómstólar sem leggi mat á háttsemina eða hegðun lögreglumanna.“

Snorri Magnússon, formaður landssambands lögreglumanna, vildi ekki tjá sig við í dag þegar eftir því var leitað og ætlar að gefa sér tíma til að fara yfir dóminn. Samkvæmt heimildum fréttastofu þá ríkir mikil óánægja meðal lögreglumanna vegna dómsins í dag.