Íslenskur heimilislæknir fastur í Palestínu

Sveinn Rúnar Hauksson, heimilislæknir og formaður félagsins Ísland-Palestína, er fastur í Gasaborg í Palestínu þessa dagana. Blaðamaður náði sambandi við Svein Rúnar í gærkvöldi eftir að hann hafði eytt öllum deginum við Rafha-landamærin að reyna að komast til Egyptalands.

„Landamærin hafa verið takmarkað opin síðustu dagana. Í dag var opið í fimm klukkustundir en þegar ég reyndi að komast í gegn þá var ég stoppaður. Ég skil ekki alveg af hverju. Ég held satt að segja að það sé verið að setja nýjar vinnureglur en svo er þetta líka vanhæfni starfsfólksins sem vinnur við landamærin. Ég notaði meira að segja klíkuskap þar sem ég þekki menn í góðum stöðum hér í borg, svo sem heilbrigðisráðherrann og borgarstjóra, en það virkaði ekki.“

Sveinn Rúnar átti flug heim 11. nóvember síðastliðinn en þá voru landamærin lokuð og næstu daga á eftir. Hann á svo flug heim í dag frá Kaíró sem hann náði að seinka til morguns. Hann vonast því til að komast yfir landamærin í dag.

„Ef ég kemst ekki í gegn þá gæti ég verið fastur hér í langan tíma. Í morgun [gærmorgun] gerðist þessi hryllilegi atburður þegar egypskir hermenn voru sprengdir með fjarstýrðri sprengju. Alltaf þegar eitthvað svona gerist er það látið bitna á Palestínumönnum. Vegna þessa atburðar verður landamærunum örugglega lokað til lengri tíma, jafnvel í mánuð, sem þýðir að ég verði fastur hér. Ég vorkenni mér þó ekki því hér er fjöldi manns sem hefur reynt að komast yfir landamærin í langan tíma og er alltaf vísað frá,“ segir Sveinn Rúnar.

Sveinn Rúnar fór til Palestínu til að sinna verkefnum sem félagið Ísland-Palestína stendur fyrir þar ásamt því að vera á læknaráðstefnu. Hann ætlaði að dvelja í landinu í viku en hefur verið þar í sautján daga.

„Hin landamærin eru í norðri, yfir til Ísrael. Ætli ég reyni ekki við þau ef ég kemst ekki yfir til Egyptalands. Annars hef ég lent í þessu áður við landamærin til Ísraels en þá mátti ég reyndar ekki snúa til baka á Gasasvæðið. Þeir taka bara sínar ákvarðanir án nokkurs rökstuðnings þannig að erfitt er að vita hvað býr að baki," segir Sveinn Rúnar og að þessi staða sem hann er í komi honum ekki sérlega á óvart.

„Þegar ég kom hingað í byrjun mánaðar var strax ljóst að þetta yrði erfið ferð vegna ástandsins á Sínaí-skaganum. Frá því að núverandi stjórn tók við í Egyptalandi hefur ástandið hér stórlega versnað, og nógu slæmt var það fyrir" segir Sveinn Rúnar sem ætlaði að leggjast til hvílu í lok samtals. Enda var hvort eð er búið að taka rafmagnið af borginni, eða klukkan ellefu á staðartíma, og því niðamyrkur og lítið hægt að athafna sig.