Ræsa út auka mannskap

Björgunarsveitarmenn sunnan heiða hafa þurft að ræsa út auka mannskap en þegar er búið að sinna fjölda útkalla í allan dag vegna vonskuveðursins. Minna þeir fólk á að huga að grillum og trampólínum en mikið tjón getur orðið ef hlutir sem þessir fjúka til. Öflugustu vindhviðurnar fóru upp í 52 metra á sekúndu undir Hafnarfjalli í dag.

Í tilkynningu frá Vegagerðinni segir að búið er að loka veginum undir Hafnarfjalli. Einnig er mikið óveður á Reykjanesvegi og Grindavíkurvegi og einnig á Sandskeiði. Snjóþekja og éljagangur er á Hellisheiði en

hálkublettir í Þrengslum, Mosfellsheiði og við Þingvallavatn.

Veðurfræðingur hjá Veðurstofu Íslands segir að veðrið muni að mestu ganga niður um klukkan 19 í kvöld suðvestanlands en austan og norðaustanlands gengur veðrið ekki niður fyrr en í nótt.