Þekkt persóna úr The Simpsons deyr

Þekkt persóna úr Simpsons-fjölskyldunni mun deyja í 25. þáttaröðinni sem hófst í bandarísku sjónvarpi um síðustu helgi.

Þetta upplýsti Al Jean, framleiðandi þessara vinsælu þátta í viðtali við The Canada Sun. "Ég skal gefa þér þá vísbendingu að leikarinn sem talar fyrir persónuna vann Emmy-verðlaunin fyrir hlutverkið en ég segi ekki hver það er," sagði hann.

25 Emmy-verðlaunahafar hafa komið úr röðum Simpsons-fjölskyldunnar og því hefur þessi vísbending Jean lítið að segja.

Í fyrsta þættinum í 25. þáttaröðinni var gert grín að sjónvarpsþáttunum Homeland og talaði Kristen Wig fyrir alríkislögreglu.