Skólagjöld hækka um 25 prósent

Framlag íslenska ríkisins til Háskóla Íslands á næsta ári lækkar um 321,8 milljónir króna og skólagjöld verða hækkuð úr 60 þúsund krónum í 75 þúsund krónur.

Í fjárlagafrumvarpinu fyrir árið 2014 kemur fram að áætlað sé að hækka framlag ríkisins í Aldarafmælissjóð Háskóla Íslands um 300 milljónir, í samræmi við ákvörðun ríkisstjórnarinnar í október 2011.

Þá verði lögð til áframhaldandi tímabundin fjárheimild vegna byggingar Húss Vigdísar Finnbogadóttur, 75 milljónir. Samtals hefur ríkið þá lagt 200 milljónir í byggingu hússins, sem áætlað er að kosti 1,4 milljarða. Styrktaraðilar og Happdrætti háskólans sjá um rest.

Þá segir að gert sé ráð fyrir að ríkistekjur aukist um 137,3 milljónir króna og að greiðsla úr ríkissjóði lækki á móti sömu fjárhæð.

„Þetta er í samræmi við áform um að háskólunum verði heimilað að hækka skrásetningargjald,“ segir í frumvarpinu. 

Miðað er við að gjaldið verði 75 þúsund krónur, en var áður 60 þúsund krónur. „Þessi breyting er í samræmi við greiningu opinberu háskólanna á kostnaði.“

Gert ráð fyrir að bæði ríkistekjur af skrásetningargjaldinu og útgjöldum sem þeim er ætlað að standa undir hækki um 39,2 milljónir vegna 3.300 fleiri reiknaðra ársnemenda en lagðir eru til grundvallar kennsluframlagi.

Framlag til Háskólans á Akureyri lækkar um 22,7 milljónir á milli ára, Landbúnaðarháskóla Íslands um 24,5 milljónir, Háskólans á Hólum um 35,8 milljónir, Háskólans á Bifröst um 83,4 milljónir, Háskólans í Reykjavík um 43 milljónir og Listaháskóla Íslands um 9,2 milljónir.

Allar þessar lækkanir eru að frátöldum launa- og verðlagshækkunum.