Prímadonna í aðalhlutverki í íslenskri auglýsingu

„Það var ýmislegt óvenjulegt við þessar tökur, til dæmis var mjög erfitt að fá tæki og mannskap og svo var aðahlutverkið dálítil prímadonna,“ segir Guðjón Jónsson, leikstjóri nýrrar auglýsingar fyrir tryggingafélagið Sjóvá, en auglýsingin var einnig óvenjuleg fyrir þær sakir að aðalhlutverkið leikur kötturinn Jói.

„Jói er dálítil prímadonna og gefur manni eina töku þegar hann er tilbúinn. En við vorum á tánum og þetta tókst að lokum,“ segir Guðjón léttur í bragði. 

Tökur á auglýsingunni tóku fjóra hálfa daga. „Það má deila um það hvort Jói hafi látið vel að stjórn. Eftir fyrsta tökudaginn höfðum við gríðarlegar áhyggjur af stöðu mála, daginn eftir vorum við enn ekki komin með nægt efni. Þannig að æfingar héldu áfram í helgarfríi og við fórum vel yfir málin með Jóa og á þriðja tökudegi stóð hann sig frábærlega,“ segir Guðjón um aðalhlutverkið, en eigandi Jóa er Ásta hjá Gallerí Voff.

Ýmislegt annað kom upp á við gerð auglýsingarinnar.

„Myndavél og linsur voru flutt sérstaklega inn frá Danmörku því tækin sem við vildum nota á íslandi voru öll bókuð í erlendar bíómyndir,“ segir Guðjón.

„Svo var ekki fáanlegur fyrsti ljósamaður eða gripill út af bókunum vegna erlendra bíómynda og við brugðum þá á það ráð að flytja inn menn frá Bretlandi. Svo ljósamaður og gripill voru þungavigtarmenn í faginu sem hafa áður unnið að myndum á borð við James Bond,“ segir Guðjón að lokum.