AEG bar ekki ábyrgð á dauða Jackson

Tónleikaskipuleggjandinn, AEG Live LLC, ber ekki ábyrgð á dauða söngvarans, Michael Jackson. Sú var niðurstaðan í dómsmáli sem að kveðin var upp í dag.

Það var Katherine Jackson, móðir Michael Jackson, sem lögsótti fyrirtækið AEG Live LLC, sem stóð á bakvið endurkomutónleikaferðalag Jacksons. Hún taldi það vanrækslu af hálfu fyrirtækisins að hafa ráðið lækninn, Dr. Conrad Murray, án þess að skoða bakgrunn hans ítarlega. Murray var sakfelldur árið 2011 fyrir manndráp af gáleysi en hann gaf Jackson of stóran skammt af svefnlyfjum sem leiddu hann til dauða 2 árum áður.

Kviðdómurinn í málinu gegn AEG Live LLC komst í fyrsta lagi að þeirri niðurstöðu að fyrirtækið hefði í raun staðið á bakvið ráðningu læknisins. En í öðru lagi komst hann að þeirri niðurstöðu að fyrirtækið hefði ekki mátt vita að Murray var óhæfur til starfsins sem hann var ráðinn í. Þessi niðurstaða þýðir einfaldlega að fyrirtækið ber enga ábyrgð á dauða Michael Jackson. Það hefur alltaf haldið því fram að söngvarinn hafi sjálfur ráðið Murray og að ekki hafi verið hægt að ganga gegn vilja hans.

Kviðdómurinn, sem samanstóð af 12 einstaklingum, hóf að ráða ráðum sínum 26. september, 5 mánuðum eftir að réttarhöldin hófust. Réttarhöldin veittu fordæmislausa innsýn inn í einkalíf söngvarans.