Finnst óþægilegt að gera kynþokkafull myndbönd

Söngkonan Britney Spears var gestur í útvarpsþættinum The TJ Show á fimmtudag. Þar var söngkonan spurð út í myndband sitt við danssmellinn Work Bitch, sem frumsýnt var þann 1. október. Myndbandið þykir heldur djarft en söngkonan segir lokaútgáfuna töluvert settlegri en upphaflega myndbandið.

„Stundum vildi ég óska þess að myndböndin væru líkari því sem þótti eðlilegt í gamla daga. Þegar það var bara einn heilklæðnaður og maður dansaði í gegnum allt myndbandið og það snérist ekki allt um kynlíf. Myndband sem snýst um dans, ég væri til í að gera svoleiðis myndband,“ sagði söngkonan sem viðurkenndi að henni þætti erfitt að vera svo klæðalítil í myndbandinu vegna sona sinna.

„Myndbandið var mun djarfara, en ég lét klippa þau atriði út því ég á börn. Það er erfitt að samræma móðurhlutverkið og poppbransann en ég reyni að vera fylgin sjálfri mér og finna meðalveginn í öllu sem ég geri.“