Ungfrú Heimur í beinni á Stöð 3 á laugardaginn

 

Frábærar stelpur

Megum við búast við að sjá þig í sigursæti? "Ég get ekkert sagt til um það, það eru svo margar frábærar stelpur hérna sem geta vel sinnt því starfi sem Miss World tekur sér fyrir hendur. Í raun er ekkert hægt að spá fyrir um úrslit og oft hefur það gerst að aðili sem ekki hefur verið talinn sigurstranglegur ber sigur úr býtum," segir Sigríður og viðurkennir að hún hafi verið mjög stressuð áður en hún hélt af stað í þetta langa ferðalag yfir að vera þetta lengi í burtu frá fjölskyldu og vinum.

Mikil lífsreynsla

"Annars var ég mjög spennt fyrir þessu öllu saman og get sagt í dag að þetta er þvílík lífsreynsla sem ég er að öðlast hér. Það var margt sem ég þurfti að gera áður en haldið var af stað. Farangurinn þurfti til dæmis að endast mér í mánuð. Ég náði þó að koma öllu fyrir í tveimur ferðatöskum sem er heldur lítið miðað við að margar stelpur hérna eru með 7-8 töskur. Ég þurfti meðal annars að hafa með mér íslenska þjóðbúninginn, bók um Ísland, gjöf fyrir góðgerðaruppboð og margt annað."

Sigríður segist hafa fengið ítarlegar leiðbeiningar frá Miss World Organisation en einnig fékk hún upplýsingar frá Sigrúnu Evu Ármannsdóttur sem fór í Miss World árið 2011. "Ég á frábæra fjölskyldu sem er búin að aðstoða mig og styðja í þessu öllu saman og fyrir það er ég henni ævinlega þakklát."

Heljarinnar veisla

Mega áhorfendur Stöðvar 3 búast við glæsilegri útsendingu?  "Já, ég get sko lofað heljarinnar "show-i". Má nefna rosalega flott dansatriði þar sem við dönsum þjóðdansa frá tíu löndum í okkar eigin þjóðbúningum. Við munum einnig koma fram í indónesískum þjóðbúningum og síðkjólum og sýnt verður myndefni sem búið er að taka upp síðastliðinn mánuð af því sem við höfum verið að aðhafast hér á Balí."

15 mínútna frægð

Sigríður segir öryggisgæslu mikla. "Við þekkjum orðið hótelið okkar hér á Balí jafnvel og heimili okkar. Alltaf er þó eitthvað skemmtilegt að gera, nú síðast var mini-hæfileikakeppni þar sem hver stúlkan á fætur annarri stóð á fætur og sýndi listir, dans, söng og þess háttar fyrir hópinn. Við látum okkur sjaldan leiðast, enda höfum við um margt að tala, komum frá ólíkum menningarheimum og getum endalaust talað um löndin okkar. Keppnin hefur vakið mikla athygli og okkur hefur verið tekið opnum örmum. Hvert sem við förum mætir fólk okkur með brosi á vör, komið er fram við okkur eins og Hollywood-stjörnur svo þetta eru nokkurn veginn mínar fimmtán mínútur af frægð."

Hér er prófíll Sigríðar á heimasíðu Miss World.

Stöð 3